Кудымкарын чулалiс художниккезлӧн пленэр

Август 27 лунcянь 31 лунӧдз Кудымкарын чулалic художниккезлӧн пленэр. Пленэрыс аркмис «Художники Пармы» чукӧрлӧн гӧгрӧса юбилей кежӧ – таво сылӧ тырӧ 25 год. Пленэр вылӧ локтісӧ художниккез Гайнскӧй, Кочёвскӧй, Юсьвинскӧй, Кудымкарскӧй муниципальнӧй огруггезісь да Кудымкарись.
Пленэр осьтiкӧ онлайн-режимын видеосвязь пыр участниккезӧс приветствуйтіс Анастасия Анатольевна Субботина, Пермскӧй крайись губернаторлӧн администрацияись внутренньӧй политика сьӧрті департаментicь национальнӧй да религиознӧй отношеннёэз отделлӧн юралісь. Сія корис бура да вын пуктӧмӧн уджавны, медбы быдлӧн киподувтісь петісӧ бытшӧм серпассэз.
Коми-Пермяцкӧй этнокультурнӧй центрӧн юралісь Мария Валентиновна Носкова пыма приветствуйтіс художниккезӧс. Сія казьмӧтіс, что пленэр вылын ӧтлаын тӧдса художниккезкӧт пондасӧ уджавны и томмес. Сідз, Наталья Черемных локтіс Гайнскӧй районісь. Сылӧн мог: босьтны опыт да навыккез мӧд художниккезлісь. Ас киподувтӧ Наташаӧс босьтіс Леонид Бражкин: сія сэтӧн жӧ пондіс велӧтны нывкаӧс, медбы сія рисуйтіс настроеннёӧн и природасянь босьтіс быдӧс долытсӧ.

«Художники Пармы» чукӧрлӧн юралісь Нина Юрьевна Новикова корис керны художниккезӧс набросоккез да этюддэз, медбы одзлань лӧсьӧтны эна пондӧтчаннэзісь бытшӧм картинаэз.
Юсьвинскӧй районісь Вячеслав Вакин гажтӧмтчӧм Кудымкарлӧн пейзажжез понда, уна год ни олӧ Пожва посадын и эта пленер вылын думайтӧ тӧдмавны карлicь культура. Кочёваись Ольга Жданович ассис ёрттэсӧ тшӧктіс и уджавны, и сёрнитны асколасын, эд нія дыр эз адззисьлӧ. Художниккез коласын и мӧдiк тӧдса морттэз, графиккез и живописеццез: Владимир Маскалев, Виктор Веденин, Артур Кривощёков, Константин Дряблов, Татьяна Надымова, Полина Рычкова, Александр Нисов. Медодзаись эттшӧм пленэр вылын Юрий Лесников да Анатолий Краснопёров, том художниккез Дарья Сторожева да Ирина Вилесова.
Нёль лун художниккез чулӧтiсӧ вӧр вавылын: кошшисӧ пейзажжез да рӧммез, уна мый босьтicӧ ӧтамӧдсянь. Уджалicӧ Кудымкарись Изъюрвылын, Романова, Плотникова, Лопатина, Внукова, Ивукова да Кекур деревняэзын. Гажа местаэс миян тырмӧмви, но художниккез кошшисӧ и адззисӧ ассяма торрез: важ керку, нето пӧрись пу, гажа да ота видз, нето пашмӧм кымӧр…
Август 30 лунӧ Коми-Пермяцкӧй этнокультурнӧй центрын чулалic итоговӧй мероприятие, кытӧн быдӧнныс мыччалiсӧ ӧтамӧдлӧ ассиныс лӧсьӧтӧм уджжезнысӧ–этюддэз, зарисовкаэз, кӧдна шогмисӧ бытшӧмӧсь, сӧстӧмӧсь, югытӧсь. Быд художниклӧн тӧдчӧ аслас кипод – профессиональнӧй кужӧм, кӧда пӧртӧ учӧтик виззез да кырӧлоккез пуэзӧ, керкуэзӧ, морттэзӧ. Сiдз, что картинаэз видзӧттӧн оссьӧ лов и гажьялӧ сьӧлӧм.
Ноябрь месяцын Кудымкарись Культурно-деловӧй центрын оссяс юбилейнӧй выставка, кытӧн позяс матынжыка тӧдсасьны быд художник картинаӧн.
Художниккезлӧн пленэр лӧсьӧтӧма «Общество и власть» государственнӧй программалӧн «Реализация государственной национальной политики в Пермском крае» подпрограмма пытшкын. Чулӧтicь – ГКБУК «Коми-Пермяцкӧй этнокультурнӧй центр».
Информация: Коми-Пермяцкий этнокульнурный центр.