Премия Новикова: «Еныс сiйӧ берегитӧ»

Олӧ Капилина деревняын, кӧда Архангельскӧй поселеннёын, шупыт, неыджыт мыгӧра, серӧмбана инька, кӧдӧ гажа да бытшӧм мывкыд понда поселеннёас, натьтӧ, быдыс тӧдӧ. Этӧ Климова Пелагея Петровна. Шогмис сiя Ганёва деревняын декабрь кыкдасӧт (20) лунӧ 1928 годӧ. Семьяас айыслӧн да мамыслӧн нiя вӧлiсӧ кык сой. Петiс сiдз, что сiя велӧтчис Архангельскӧй школаын только квать (6) год. Кадыс вӧлi сэтшӧм, что етша кин вермис велӧтчыны унажык.  Школа чапкӧм бӧрын кык год уджалiс колхозын горт деревняын. А сьӧкыт войнася 1943 годӧ сiйӧ ыстiсӧ уджавны куреньӧ. Пӧрӧтны да грузитны вӧр и мужиккезлӧ сьӧкыт, а кытшӧм вӧлi сылӧ, дасвит (15) годся нылочкалӧ! Уджалiс сэтчин вит тӧв. А тулысӧн, гожумӧн да арӧн гӧрис, кӧдзис, сенокоситiс, вундiс, да етша разь колхозас уджыс годлӧн быд кадӧ. Курень бӧрын уджалiс вит (5) год дояркаӧн. Быд асыв, кӧр быдӧнныс эшӧ узьӧны, колӧ котӧртны ни фермаӧ, рытнас локтан гортӧ сэк, кӧр мукӧдыс тожӧ узьӧны ни. Медодз чеччан, а водан медсёрӧн. Вӧлi ӧддьӧн сьӧкыт, но эд кокнитжык  сэк эз и вӧв некинлӧ.

Кӧр Пелагея Петровналӧ тырис кыкдас нёль (24) год, сiя петiс жӧник сайӧ. Öнi серӧм сорӧн висьтасьӧ, кыдз пӧ первуись казялi этӧ зонкасӧ, сiдз пӧ и «сӧтiс сьӧлӧмам». А зонкаыс эта вӧлi Капилина деревняись Василий Егорович. Вӧлi сiя беднӧй семьяись, абу вермӧм велӧтчыны школаын. Тыдалӧ, сылӧ тожӧ «сӧтiс сьӧлӧмас», нiя гӧтрасисӧ. Жӧник пондiс уджавны колхозын трактористӧн. Олiсӧ ӧтлаын нёльдас (40) год. Мый только эз вӧв оланас эта коста. Кӧр шогмисӧ ни кык пиян, жӧниксӧ босьтiсӧ кык год кеж армияӧ ылын Хабаровскӧ. Том инька горзiс, сiдз кыдз полiс, кыдз пондас чулӧтны ойлунсӧ кык учӧт кагаӧн, кӧр жӧникыс ылын. Бура отсалiс челядькӧт жӧникыслӧн баб, кӧдӧ деревняас быдӧнныс шуисӧ Сана бабӧн.

Жӧникыс бертiс армияись, олан кывтiс одзлань, шогмисӧ сьӧрсьӧн-бӧрсьӧн эшӧ куим пиян. 1965 годӧ мунiсӧ уджавны Крохалёвскӧй леспромхозӧ Верх Кучаӧ. Жӧникыс пӧрӧтiс вӧр, а Пелагея Петровна уджалiс садикын. Дӧнзис сылӧ кык год уджавны и вӧрын. Сизим (7) год коста, кӧр нiя олiсӧ сэтчин, семьяын содiсӧ эшӧ ныв да зон. Леспромхоз пӧднассьӧм бӧрын семья бертiс горт деревняӧ. Эстӧн и олiсӧ нiя пӧрисьмытӧдз, уджалiсӧ колхозын пенсия вылӧ петтӧдз. Гортын ни шогмис медучӧт зон Василько.

Быдӧссӧ Пелагея Петровналӧн жӧникыскӧт вӧлiсӧ кыкьямыс (8) пиян: квать (6) зон да кык ныв. И эстӧн инькаыт бӧра сералӧ, быдӧннысӧ пӧ чужтi гортын, родильнӧй пытшксӧ пӧ эг и адззыв. Мед сымда челядьсӧ сувтӧтны кок вылӧ, ковсис шупыта бергавны и гор одзын, и пода гӧгӧр, и карчйӧрын, и удж вылӧ колхозӧ ештыны аскадӧ. Вӧлi и бурыс и умӧльыс , но быдтiсӧ да велӧтiсӧ быдӧннысӧ. Мымда колiс мыла да терпеннё, тӧдӧ только ачыс Пелагея Петровнаыс. Пияннэз коласын эм и военнӧй, и дальнобойщик, и ткачиха, и нефтяник, и заводын уджалiсь. И олӧны нiя омӧн страна пасьта: Кудымкарын, Перемын, Ивановскӧй областьын и даже Украинаын.  Быдлӧн аслас семья, аслас горт. Öнi Пелагея Петровналӧн даскуим (13) внучок да кыкдас куим (23) правнучок.  Эта и эм сы понда медыджыт шуд, кыдз и быд мам да баб понда.

Мый  только эз адззыв аслас ӧкмысдас (90) годся оланын Пелагея Петровнаыс. Не весь эд соседкаэз шуӧны, что еныс сiйӧ берегитӧ сы понда, что сымда ни терпитiс. Абу ни ловьяӧсь куим зон, а дзебны мамлӧ ассис пиян —  эм разь этася ыджытжык шог? Шогмис сiдз, что дзебис ни кык внучокӧс, одзӧв дзебис и жӧниксӧ.  Кыкдас кыкьямыс (28) год ни олӧ ӧтнас. Видзӧ карчйӧр, кӧдӧ гожумбыт дозирайтӧ ачыс, а гарйыны отсалӧны пияннэз. Дас (10) год только эшӧ чулалiс, кыдз дугдiс видзны мӧс. Отсалӧ челядьлӧ да внучоккезлӧ карчӧн, а кӧр вермӧ и сьӧмӧн (деньгаӧн).

Пелагея Петровна одззамоз боёк, рам сьӧлӧма, сьылiсь да йӧктiсь, умӧльсӧ сы йылiсь оз висьтав некин. Соседкаэс да модззес сылӧн ӧтiк ӧмись шуӧны, что деревняын сiя некинкӧт оз лӧгав, оланыс сылӧн ны син одзын чулалiс, пыр вӧлi шупыт, фермаын ли уджалiс, ыб нето видз вылын ли, ассис уджсӧ бура тӧдiс да керис бытшӧма. Пенсия вылӧ ни петiс, но эшӧ не ӧтiк год отсалiс колхозлӧ. Бур удж понда наградитӧм медальӧн «За доблестный труд», эмӧсь уна почетнӧй грамотаэз. Тырмис выныс да прокыс овны ыджыт семьяӧн, видзны ыджыт хозяйство, и быдлаын сылӧн вӧлi порядок: и карчйӧрын, и картаын. и горт гӧгӧрын, и керкуын.

Кытӧн Пелагея Петровна, сэтӧн шум да гаж, и серӧмтӧтас быдӧннысӧ, и сьылӧтас, и ӧмавны вермас, эд сiя, кыдз шуӧны роччез «кыв понда карманӧ оз пыр». Ордчӧн сыкӧт кокнит, сысянь, натьтӧ,  сы гӧгӧр и  пыр уна отир.  Öддьӧн радейтӧ сьывны да йӧктыны. Уна год участвуйтiс деревняын художественнӧй самодеятельностьын. Бура сьылӧны сылӧн и зоннэз да ныввез. Зоннэс эшӧ и бур гармонисттэз.

Мӧймуся юбилей вылӧ, Пелагея Петровналӧ тырис ӧкмысдас (90) год, сылӧн челядьыс керисӧ мамныслӧ бур козин. Корисӧ юбилей вылӧ орсны гармонняӧн Анатолий Полуяновӧс. Вот вӧлись юбиляршаыс и сьылiс да йӧктiс пӧттӧдз! Гажӧна да кокнита чулалiс юбилейыс, да и вермас разь лоны мӧднёж эта ыджыт да дружнӧй семьяын!

Казялан этӧ инькасӧ, и сьӧлӧм вылын лоӧ гажажык. Натьтӧ, сысянь, что ачыс сiя кужӧ гажӧтчыны и кужӧ сетны ассис гажсӧ нылӧ, кин сыкӧт ордчӧн.

Быдӧс бурсӧ  Пелагея Петровналӧ, мед сiйӧ эшӧ дыр Еныс берегитӧ,  и ась сiя эшӧ уна год гажӧтӧ быдӧннысӧ, отсалӧ  челядьлӧ да внучоккезлӧ, а нiя ась некӧр оз вунӧтӧ гортаныс туй асланыс мам дынӧ.

 

КЫВБУР

Мам пӧрисьмис

Пӧрись мам ӧшын дынӧ сибӧтчис,

Висьӧ кос, и умӧля ни адззӧ син,

Лымӧн тырӧм туйыс ӧдва тӧдчӧ,

Эз кежав важын таладорӧ некин.

 

Вӧлi том кӧр, и жӧникыс вӧлi ловья.

Быдтiсӧ пияннэз, пода карта тыр,

Бур паськӧмсӧ, натьтӧ,  эз и новйы.

Ась пӧ челядьыслӧ только лоӧ бур.

 

Но оланыс керис сiдз, кыдз колӧ,

Пессьы, кӧть эн пессьы, сiйӧ он бӧбӧт.

Зон гӧтрасис, ныв жӧниккӧт олӧ,

Да  хозяин кулiс, иньсӧ сьӧрас  эз нӧбӧт.

 

Кӧть тэ мымда горзы, колӧ овны,

И уджавны колӧ, он эд чапкы горт.

Эз пукав некӧр весь, ештыны мед омӧн,

Но кӧр дзебис зонсӧ, нач пӧрисьмис морт.

 

Думанас видзчисьӧ, вот пӧ локтас нылӧ,

Лонтас баня и весӧтас лым,

Только весь надейтчӧ, некӧр сылӧ,

Кӧть и олӧ мамыс дынсянь неылын.

 

Пемдӧ ни, а мамыс сё видзчисьӧ,

Кӧть и тӧдӧ одзлань, оз ни лок отсӧт,

Сё зубытжыка сьӧлӧмыс  жмитчӧ, висьӧ…

Локтӧ мамныт дын, кӧр ловья сiя, сэк.

 

Майя Кривощёкова

Фото предоставлено Майей Кривощёковой.

Материал публикуется в рамках конкурса «Премия Новикова».