Комиэз кошшӧны шуд

«Эм мненнё» — сідз шусис «гӧгрӧса пызан», кӧда чулаліс Коми-Пермяцкӧй этноцентрын да кытӧн баитісӧ коми-пермяцкӧй кылын вились чужӧм кыввез йылісь.

Медодз Маргарита Галкина шыӧтчис аудитория дынӧ, кытӧн пукалісӧ кыв сьӧрті специалисттэз, кыввез миян чужӧны или нійӧ чужтӧны. Ӧтіккез шуӧны, что «кывсӧ чужтӧны отир, а сы кылісь вермасӧ чужны производнӧй кыввез», мӧдіккез чайтӧны, что «кыввез чужӧны и кулӧны кад мунікӧ».

Но кӧркӧ чужтӧм кыввез ӧні вились пырӧны серниӧ, сійӧн нія ӧння поколеннеэзлӧ лоӧны вильӧсь, вильмоза пырӧны вежӧрӧ. Эттшӧм кыввеззас лоӧны: шуд, дзоридзалӧ и мӧдіккез. Энӧ кыввесӧ советскӧй периодся поэзияын мийӧ огӧ панталӧ. Ны туйӧ авторрез пыртісӧ шуч: счастье, цветитӧ…

Людмила Ратегова шуӧ, что ӧнӧдз сы дынӧ локтӧны отир объясненнеэзла, мыля газетаэзын гижӧны «шуд», эд эта кылыс ны обиходын эз вӧв. И кытісь сія лоис коми кылын? Людмила Петровна казьмӧтӧ, что эта кылыс кывчукӧрас, кӧдӧ чукӧртісӧ Антонина Кривощекова-Гантман да Раиса Баталова, эм. А пыртны аслас произведеннеэзӧ бӧр сійӧ пондіс тӧдчана гижись Фёдор Истомин. Сія творчествоас пыр старайтчис пыртны виль кыввез, и этӧ кывсӧ сія тшӧтш представитіс общественностьлӧ.

— Кӧр пондіс паськавны коми отир коласын роч кыв, гижиссез старайтчисӧ сійӧ паськытжыка используйтны асланыс гижӧттэзын, и некин эз разбирайтчы, мыля коми тексттэзас эмӧсь роч кыввез, бытьтӧ сідз и колӧ. И только 70-80-ӧт годдэзӧ пондісӧ думайтны комиӧтны кывсӧ и бӧрлань видзӧтны, кошшыны виль важ кыввез, — шуӧ Людмила Петровна.

Сідзжӧ кылас бӧр пырӧны кыввез: аттьӧ, вежалун, небӧг и мӧдіккез, кӧднӧ отир некыдз бы озӧ примитӧ. Уна важ кыв позьӧ адззыны Николай Роговӧн лӧсьӧтӧм кывчукӧрись. Ас кадӧ сія ветлӧтіс деревняэзӧт да баитіс отиркӧт, сідз чукӧрмис быдса лексикон.

Уна кыв миян оланіс муніс ни бӧр берттӧг. Кыдз предметыс мунӧ, сідз и кылыс. Шуам, адзлас (острога), черикыйиссез озӧ ни кыйӧ черисӧ сійӧн, сідзкӧ кылыс оз ни ковсьы. Дзуртби, йӧгпеш (ёгпеш), пельняньёсь, шайт – эна кыввес мунісӧ, сідз кыдз предметтэс оланісь кад босьтіс ас сьӧрас. Нійӧ вежисӧ мӧдік кыввез. Но нія вӧлісӧ оланын, и коліс бы история понда учёнӧйезлӧ керны ны сьӧрті неыджыт научнӧй уджжез.

Кыдз кылыс чужӧ и колӧ я комиӧтны кыввез, эта йылісь позьӧ баитны уна и дыр. Дискуссия пондас мунны одзлань. Быдӧс эта керсьӧ сы понда, медбы пондӧтчыны гижны виль кывчукӧр, кытчӧ бы пырисӧ виль (а то и важ) кыввез и отир пондісӧ паськыта нійӧ пыртны асланыс оланӧ.

Фотография вылын: Кыкнан кывчукӧрас, кӧдна лӧсьӧтӧмӧсь Николай Роговӧн (вылынжык) и Раиса Баталова да Антонина Кривощёкова-Гантманӧн, эм кыв «шуд».

Ирина Дульцева

Добавить комментарий

Ваш e-mail не будет опубликован. Обязательные поля помечены *