К юбилею славного человека

– Ноко, Ёгорика, висьтась, эн эшӧ ветлы видзӧтны ичмоньсӧ? Митишна Аннаыслӧн тай ӧтік зоныс гӧтрасьӧм пӧ. Мый нӧ тэ миянлӧ он ошшась, он юӧрт, соседка эд нылӧн?

– Мый висьтасьны? Невеста кыдз невеста. Тӧн тай пыралышті асывнас недырик кежӧ, дак сія тай сё койка вылын вӧлі. Росьтпеттё та-ай кыдз узьӧ-ӧ. Анна пода дозирайтӧ, стряпайтӧ. А Валька бабыс шуӧ, ась пӧ шоччисьӧ, сія эшӧ том, челядь сэсся лоасӧ, дак некӧр лоас узьны.

– А тэ мый нӧ?

– А мый ме? Шуи тай жӧ, отирыс, мыся, эд пондасӧ осудитны ичмоньнытӧ, дыр узьӧ да. А Валька бабыс шуӧ, ась пӧ баитӧны, ӧмныс сы понда и эм. Баитӧв-керасӧ, да дугдасӧ, видзӧтан-ко, чожа мӧдіккез йылісь пондасӧ баитны. А миян Толялӧ славнӧйӧ еныс парасӧ сетіс. Кыкнанныс айтӧмӧсь, ӧтамӧдӧс пондасӧ кывзыны, дак бура пондасӧ овны.

– А тэ мый сэтчӧ?

– А мый ме? Горӧтчи тай, мыся, инӧ мироння жӧ? Толяныт кодь жӧ? А Валька бабыс сэтчӧ, век пӧ мироннэс вӧлісӧ и век лосӧ. Мироннэз вылын пӧ мирыс ӧшшӧ.

– Сідз пӧриссес баитлісӧ. Аникин Иван тай пыр висьтасьӧ, кыдз война высянь пондасӧ гортӧ локны, дак командирыс пӧ шуӧ: ӧні пӧ тійӧ бертат гортӧ, эд вунӧтӧ, отвечайтат пӧ быдӧс олан понда, тіян пӧ обязанность не только гортын вӧвны мужикӧн, но и отсавны ӧтка инькаэзлӧ, кин кольччис жӧниктӧг, и эшӧ государство одзын обязанность: содтыны населеннё.

– Вот и петӧ: осудитны эттшӧм делосӧ оз туй. Ен сідз шуӧм овны. Но, эдӧ ни сьӧкытыс йылісь баитӧ. Висьтась, Ёгорика, невестаыс йылісь.

– Висьтась, кытісь инӧ, кытісь пӧ невестаыс, эн юав?

– Юалі. Толя, мыся, кытісь инӧ адззин модзтӧ. А сія насьмек висьталіс: Ош ыб вылісь пӧ, шогді коласісь. Ичмоньыс чеччис, а сійӧ: Надю да Надю. А ме бытьтӧ Валька бабыскӧт баита, а ачым гусьӧник вӧджжа, кытшӧм, мыся, ноко Надюныс. А сія, быль, кыдзю вылісь босьтӧм: юрсиыс кузь да виж, воӧм шогді кодь, синнэс ыджытӧсь, вӧз чветкиэз кыдз. Ен сетӧм и эм вевдӧрсяняс. Дак эд ачыс умӧличок, кӧть и мыгӧра. Ог тӧ-ӧд, эта, натьтӧ, Митишналӧ, чередь роботнича лоас. Лебезнӧй чача кодь да.

Томувьят, Ёгорика, ачыт сэтшӧм жӧ эд вӧлін, вунӧтін ни разь? Пӧриссес ӧні только нучоккез ни пондасӧ видзчисьны. А уджавны – мужикыс мый понда? Зонныс местаас оз ӧшшы, кӧть том, а только котрасьӧ-уджалӧ. Мый бердӧ бы эз кутчись – некӧй пору керас.

– Да и ӧні работасис инька невна мезмис. Вӧрын не уджавны, лён не вӧдитны, дӧра не кыйны. Кӧмкӧт-паськӧм не лӧсьӧтны – быдӧс магазинын эм. Деньга только колӧ.

– Ой-ой, миянлӧ сьӧкыта дӧнзис…

– А ичмоньыс пӧ некак учительша, Ёгорика?

– Сідз тай Валька бабаыс горӧтчис.

– Но эдӧ ни треситӧ ичмоньсӧ. Миянлӧ мый? Мийӧ ӧні путшалӧм письтиккез ни.

– Умӧльсӧ нем эдӧ ог баитӧ. Мый эм, сія и кыв вылын. Валька баб тай шуӧ, невестаыс пӧ жӧник саяс мунас, дак куим год пӧ гор вылас отопкиыс сералӧ, – горӧтчис медбӧрын баба Ёгорика.

Инькаэз торйӧтчисӧ. Быдыс аслас думаэзӧн. Кинлӧн нія вӧлісӧ радӧсь, кокнитӧсь: виль семья аркмис, челядь унажык лоасӧ, уджаліссез содасӧ! А кинлӧн тӧждісянаӧсь том годдэз понда, кӧдна оз ни бертӧ. А кин вӧрзьӧтчис сьӧкыта ловзисьӧмӧн, дзугыльтіс дума: сылісь модзсӧ мырддис война…

Юӧррез вайисӧ, юӧррез лэбзисӧ… Чулалас лун-мӧд – вильӧсь локтасӧ. Бӧра юӧр новйӧтіссезлӧн лоас удж! И эта ӧддьӧн бур! Сідзкӧ, олан пансьӧ, зорамӧ, вильмӧ, горалӧ!..

А миян том гулюэз жагӧник поз тэчисӧ. Керку лэбтісӧ – ыждӧтісӧ оланін, паныт эшӧ сувтӧтісӧ ӧтікӧ (чом понда). Кагаоккез шогмисӧ – Серёжа, Андрей. Томмез уджалӧны, а пӧриссез вӧдитчӧны. Баба Ёгорика сэтӧн жӧ. Гажтӧм ӧтнаслӧ гортас пукавны, локтас и отсалӧ прибауткаэз сьывны да тпрукитанкаэз:

Пантетюрика телегу продала,

На телегу балалаечку взяла.

Балалаечка заигрывает,

Пантетюрика наплясывает.

Балалаечка, играй, играй, играй!

Пантетюрика наплясывай!

Сы коста баббез чеччӧвтӧтлӧны кагаэсӧ пидзӧссэз выланыс, коккезнысӧ зорӧтӧны, мед пӧ чожжык котӧртісӧ. А медучӧтныс, Катюыс, баббесӧ эз ни тӧд…

Валька баб семьяас вӧлі медшӧр вуж. Сыын вӧлі дзебӧм медыджыт мудрость. Сылӧн советтэз бура пригодитчисӧ том семья оланын. Аймам кужисӧ быдтыны-воштыны челядьнысӧ. Быдӧнныслӧ отсалісӧ босьтны высшӧй образованнё. Ӧні Сергей уджалӧ Юсьваын, МВД органнэзын. Сія аймамлӧ хозяйствоын меодзза и медыджыт отсасись. Андрей Перемын. Классическӧй универститетісь химическӧй факультет кончитӧм бӧрын уджалӧ инженер-химикӧн, керӧ рулісь да валісь исследованнёэз. Катя тожӧ Перемын, велӧтчис культурологӧ. Быдыслӧн асланыс интерессэз оланас. Мый бердӧ только оз кутчисьӧ! Быдлаӧ эм толк. Родсӧ эд оз ӧштӧ. Андрей свободнӧй кадӧ уджалӧ гончарнӧй круг вылын, керӧ сёйись дозмук да сувениррез. Гортас вайӧм жӧ, подарок пӧ. Отпускӧн уна путешествуйтӧ мирӧт. А Катялӧн хобби – рисуйтны картинаэз. Ассис уджжесӧ мыччалӧ интернетын. Сьӧлӧм радъялӧ, видзӧтан кӧр ны вылӧ.

Зорамис годісь-годӧ Толялӧн да Надялӧн семья. Сія вачкисьӧ ладнӧӥ, аккуратнӧй липалӧн семья ладорӧ, кӧда поздісьӧма карчйӧр боканыс да не ӧтік век ни дорйӧ учӧт быдмассэсӧ кӧдзытсянь да ой ладорся тӧввезсянь, кӧда эшӧ и аслас дзоридззезісь ма козьналӧ мошшезлӧ.

Хозяйство жын-жын сулалӧ. Мый колӧ медодз олан понда да керкуын уют понда, сы вылын и сы понда уджалӧны. Толя шуӧ, миянлӧ пӧ роскошь оз ков, медбы асланым позын вӧлі бы удобно овны, медбы сьӧлӧм вылын семьяыслӧн вӧлі гаж.

Быдкодь живностьыс картаын (а гожумнас керку дынын не ӧтік йӧрын): и мӧс, и порсь, и кӧза, и курӧггез, и дзодзоггез, и кроликкез. И понокӧс, и каннезӧс быра любитӧны. И мошчуркаыс карчйӧрас тырмӧмви. Не етша ковсьӧ кад дозирайтны-быдтыны, юктавны-вердны быдӧннысӧ. Турун гожумӧн заптыны, да и быдкодь сёян подалӧ колӧ – эта йылісь деревняись олісьлӧ не висьтавны! Кыдз комиэз шуӧны, уна ньылӧм колӧ лэдзны да киподдэзӧ чорыт гаддез шедтыны. Дак эд быдӧс нія ештӧны! Толя неыджыт мыгӧра, а зэв шупыт. Удався-удав! И гортас ештӧ, и зоныс дын керку строиттӧн Юсьваын бергалӧ, и отирлӧ отсасьӧ аслас тракторӧн. Кӧть пенсия вылӧ ни петіс, а уджалӧ сё эшӧ кыдз проворнӧй мужик, оз жалейт асьсӧ, о-оз! Гожумнас и пода иньдӧ-вайӧтӧ, и масӧ вӧдитӧ, и тшак-ягӧдсӧ ештӧны инькӧт вайны, и чериалӧ арсянь тулысӧдз, и пессӧ медодз кералӧ. Нем шуны, крепыт хозяин! Заботливӧй и ответственнӧй!

А Надюӧс важын ни величайтӧны Надежда Юрьевнаӧн. Ок, баба Ёгорика, баба Ёгорика, ӧні бы, натьтӧ, бура ни каитчис, мыля кӧркӧ ичмоньсӧ шуис лебезнӧй чачаӧн да нероботничаӧн. Ӧні бы сія важын ни омӧн коми му вылӧт паськӧтіс бур юӧр: кытшӧм сылӧн соседкаыс хозяйственнӧй, порядочнӧй, кытшӧм вежӧра – умнича! И кыдз одзжык жӧ (баббез дырни), сідзи ӧні вӧлі бы сія эта керкуын дона гӧсьӧн.

Валька баб сьӧрті, Надежда Юрьевна, быль, Ен сетӧм. Ме сідз жӧ шуа. Сылісь сӧдзловсӧ,кӧдӧчужтӧннясЕныскозьналӧм, овтӧнняс нем абу вермӧм гудыртны. Кӧть и быднёж жӧ овсис сылӧ: мамыс куліс одз – нывка кольччис подростокӧн, уджын пантасьлісӧ сьӧлӧм дзугыльтан луннэз, да и етша разь петавлӧны оланас быдӧнныслӧ сьӧд виззез… Но быдкодь думаыс сы пытшкын чужӧ да олӧ сӧстӧма. Сылӧн лолыс оз лэбтісь некинӧс осудитны. Лыддьӧ, что эта вылӧ сылӧн право абу. Сія некӧрнекинӧс кылӧн оз дойд, некин делоӧ юр оз сюй. Кылӧн весь оз сяркйы, а баитӧ гусьӧник, обходительнӧя. Конечно, дзирыт кадӧ, старайтчӧ асьсӧ справедливӧя дорйыны, кыдз этӧ керӧ му вылісь быдкодь ловья тор, нельки учӧтик ловья торок. Но дорйисьӧмыс не пыр петӧ: инька кольччывлӧ зубыта дойдӧм.

Дойдӧм да гудыртӧм местаэсӧ гывьялас сӧдза да сэтчӧ дзоридззез садитас (кыдз кужат – сідз и вежӧртӧ). Чулалас сьӧлӧм вылісь шогыс. Шыннялӧ керкуыс да керку гӧгӧрыс омӧн дзоридззезӧн. Надежда кужӧ нійӧ вӧдитны, быдыслӧн аслас колана места. Дзоридззесӧ бӧрйӧ нійӧ, кӧда керку гӧгӧр му сьӧрті да кӧднасылӧ лӧсялӧны да гленитчӧны, а не сідз, мед мыйкӧ сюйны-чапкавны да сер пондас видзны порядоктӧг. Быдӧс садитӧм быдмассэз, карч дозирайтӧ научнӧй знаннёэз сьӧрті, кӧднӧ босьтӧ колана книгаэзісь. Удж сьӧртірезультаттэз гижлӧ, сравнивайтӧ. Тулыссянь сёр арӧдз гозйӧн гуддисьӧны карчйӧрын, садын уджыс – голя ви. Не етша отсалӧы и челядьныс.

Бур настроеннё да небыт сӧстӧм лов корӧ и карчйӧр. Вот этӧ, зелёнӧй писӧ, колӧ закаляйтны, а этӧ шонтны, этакӧт чорытжыка баитны, а этакӧт сёрнитны небытика, лележитны. Эталісь колӧ бокккесӧ чеплялыштны, эталісь листоккесӧ малыштны. Быд быдмасыс ловья, кылӧ, вежӧртӧ хозяинсӧ да хозяйкасӧ, топ кыдз асланыс вежӧра зоннэс да нывныс. Миян, соседдэзлӧн, карчйӧрын тыр веж чветки да хрен. Нылӧн абу. Миян муыс чорыт да кын. Нылӧн – небыт да сыв. Миян ва пукалӧ – нылӧн кӧс, рышкыт. Миян кынтӧ быдмассэсӧ – нылӧн шонді. Вот кыдз оланас овлӧ. Быдӧс усадьба нылӧн «шонді увтын», а соседдэз усадьба весьтӧт пыр кытшӧмкӧ кымӧржуггез уйӧны да везйӧтӧны дыш.

Арнас видзӧтан: бель видзӧны карчйӧраныс капуста юррез, сяр куйлӧ картошка гарйиссез бӧрын. Ӧтік теплицаын красуйтчӧны лӧз бока баклажаннэз, сера дора патиссоннэз, мӧдікын – огуреццезісь гырись пристежжез тыдалӧны, куимӧтын – гӧрд-веж ӧшалӧны тыра кисьтиа помидоррез. Кӧда синьор-помидорыс килограмм лэбтӧ, а кӧдна чуньпон ыждаӧсь, кыдз доноккез.

Гӧститӧтас хозяйка, ӧмӧ чапкыштан – сідз и сылыштас чӧс видзана донок. А килограммовӧй помидорресӧ кыкнан киам силӧй сюйыштас, этӧ пӧ сьӧраныт гӧснеч.

Назём кучаэз тожӧ весь оз олӧ. Ас вытаныс нія торйӧтӧмась кӧньӧс ӧм пасьта тыкваэз, порсьпиян кодь кабачоккез. Садын ягӧдыс сяр кусттэз вылын, а му вылын – клубника, вежӧрттӧг-юасьтӧг казялан: медбур сорттэз! Син гусялӧ!  А свежӧй зелёнӧй быдмассэз салаттэзӧн сёйӧм понда да приправаэз понда – теплицаын одзся-одз тулыссянь сёр арӧдз, и нельки тӧвся пызан вылын нылӧн зелень.

Пырыштан кӧр ны дынӧ, адззан: гозйӧн стряпайтӧны, пуӧны, солалӧны тӧв кежӧ, маринуйтӧны, компоттэзлӧсьӧтӧны. Мый только оз кужӧ керны! Надежда Юрьевнашуас: «Локтӧ жӧ, пуксьӧ. Чай туруннэзісь юыштам. Толя миян талун торт пӧжалӧма, кӧд коста ме школаас вӧлі, а ме вот локті да пирӧггез письтикись яй сорӧн кери. Пуксьӧ, пуксьӧ…»

Арся рытӧ ӧтӧрын нять, кӧдзыт тӧв, зэр, тӧлӧн – мороз, а ны керкуын гажа, югыт, шоныт. Медодз син вылӧ усьӧны ӧшын вылын кашничоккез. Нійӧ Толя пыртӧма цветникись да сюйыштӧма розалісь отводкаэз. Мӧму пӧ лӧсявлісӧ, поди, и таво мыйкӧ аркмас. Арсянь тулыс кежӧ ни лӧсьӧтчӧны.

Надежда Юрьевна пукалӧ часто компьютер сайын. Ӧння кадӧ сытӧг некытчӧ! А кӧр гӧрдззисьӧ. Анатолий Николаевич лыддьӧтӧ газетаэз, журналлэз. Эттшӧм гижӧтыс нылӧн уна. Кӧть ойӧдз ны дынын пукав да лыддьӧт, кыдз библиотекаын, читальнӧй залын. Мый тэныт колӧ тӧдны, кыдз вежӧртны олансӧ, сибӧтчы Надежда Юрьевна дынӧ, кӧть кӧр быдӧс вопроссэзӧн сія тэныт отсалас, бытшӧма объяснитас.

Локтан годӧ лоас нёльдас год ни, кыдз аркмис нылӧн семья. Кӧркӧ бабныс шуис томмеслӧ, кывзыны пӧ ӧтамӧдӧс пондасӧ – бура пондасӧ овны. Этӧ коми-пермяккезлісь дженытик изреченнёсӧ «кывзыны ӧтамӧдӧс» ӧння кадӧ колӧ вежӧртны (ме сьӧрті) сідз: «Жить в согласии, слышать друг друга, уступать разумно друг другу». Этадз и олӧны Анатолий Николаевич да Надежда Юрьевна. Тӧдӧны, мый понда нія аркмӧтісӧ семья. Сысянь нія ӧтамӧднысӧ бура донтӧны, берегитӧны, жалейтӧны. Эта вылын, ме думайта, и видзсьӧ нылӧн бытшӧм семья. Этасянь нылӧн и тыра доз.

Некыдз оз туй не юӧртны талун Надежда Юрьевна кыдз велӧтісь йылісь. Сія кончитіс 1977 годӧ Кудымкарскӧй педагогическӧй училище, сэсся Пермскӧй государственнӧй университетісь историческӧй факультет. Но мый керан? Учӧт школаэзын чассэз етшаӧсь, и петіс сідз, что сія уна годдэз ни Доеговскӧй школаас чулӧтӧ уроккез русскӧй да коми-пермяцкӧй кыв да литератураэз сьӧрті. Кӧть историясӧ тӧдӧ бурся-бура.

Кӧр ме сылісь юаси, сетас я сія соглассё сы вылӧ, мед гижны газетаӧ заметка, сія сэк жӧ пондіс пыксьыны, ті пӧ мый сэтшӧмсӧ баитат, менам пӧ оланыс обычнӧй, кытшӧм уналӧн, менам пӧ нем бурыс абу, уджын пӧ абу ыджыт результаттэз. А ме шуи: «Ме бы сэтшӧм йылісь и висьтася, кӧда обыкновеннӧй простӧй коми морт, кӧда оз ошшась аснас».

Ошшасьӧмлӧн ӧтік воть абу эта морт пытшкын, кӧть удж сьӧрті результаттэз сылӧн не умӧльжыкӧсь мӧдіккезсянь. Сія уджалӧ не одзасьӧмӧн, тэрмасьтӧг. Уроккез понда материалсӧ сідз и этадз ӧшлас, дзик пож пырья сысъялӧ да, йикитӧмӧ ни, не сорасьӧмӧн тэчӧ колана джаджоккез вылӧ, кытісь кужӧмӧн чеплялӧ да козьналӧ лунісь-лун велӧтчиссезлӧ. Быд пуктан оценка соответствуйтӧ челядь знаннёэзлӧ.

Доегись уна челядя мам Аникина Зинаида Георгиевна баитӧ: «Менам велӧтчисӧ вита. Уна велӧтіссез дынын пукавлі уроккез вылын, родительскӧй собраннёэз вылын, чулӧтлім праздниккез… Надежда Юрьевна дынӧ шедлі только ӧтпырись, кӧр сія менам Настялӧн недыр вӧлі класснӧй руководительӧн. Сія сэтшӧм бура чулӧтіс родительскӧй собраннёсӧ, что ме ӧнӧдз помнита сылісь содержаннё, кытшӧм овлӧ мортлӧн темперамент да кыдз уджавны челядькӧт ны темперамент сьӧрті. Надежда Юрьевна требовательнӧй, но ӧддьӧн справедливӧй. Чулаліс 20 год гӧгӧр ни, а эта мероприятие вылын велӧтісьлӧн сёрниыс сё юрам видзсьӧ, бытьтӧ тэчӧма полкаэз вылӧ».

1995 годся школаись выпускник Мальцев Александр Николаевич (ӧні олӧ и уджалӧ Перемын) пыр касьтывлӧ сьӧлӧмсянь: «Надежда Юрьевна – менам медлюбимӧй учитель. Ме не ӧддьӧн бура велӧтчи, кӧр дышӧтчывлі, кӧр гортын вӧвлі не сідз, а вӧлі способнӧй зонкаӧн. Мӧдік велӧтіссез менӧ видлісӧ, а сія пыр баитіс добрӧя, терпеливӧя. Эз лӧгав».

А неважын кыдзкӧ звонитӧ меным Перемсянь Мальцева Татьяна Сергеевна. Сія Доегсис школасӧ кончитіс 2010 годӧ, получитіс высшӧй экономическӧй образованнё, уджалӧ аслас призваннё сьӧрті. Таня юалӧ, кӧр жӧ пӧ Надежда Юрьевналӧн юбилей. Ме пӧ сылӧ ӧддьӧн благодарнӧй. Сія пӧ сетіс крепыт, пыдын знаннёэз. Сы удж пырья ме пӧ русскӧй язык да литератураӧн ЕГЭ сьӧрті босьті медыджыт баллэз. Сыӧн сетӧм знаннёэс меным унаӧн отсалӧны, пригодитчасӧ и одзлань. Сія профессиональнӧй учитель.

Куим мортлісь только ме босьті отзыввесӧ. А мый ыжда ны пытшкын велӧтісьлӧ сетӧм доныс! А эд велӧтісь пырйӧт мунісӧ уна челядёклӧн олан серрез. Кытшӧмӧсь нія только эз вӧвлӧ: кӧдакӧт ковсис асьтӧ чорытжыка видзны, а кӧдалісь коліс юрсӧ гладитыштны да спинасӧ лапкӧтыштны… Кыдзкӧ меным Надежда Юрьевна мыччалӧ велӧтчисьлісь тетрадь вевдӧр, а сія сэтчӧ ассис фамиллё «Семушев» туйӧ гижӧм «Сяо мяо ляо». Велӧтісь челядьлісь пӧ юалӧ, кытісь нӧ пӧэттшӧм велӧтчисьыс, челядь, миян дынӧ локтӧм витӧт классас велӧтчыны! А нія пӧ горӧтӧны: «Китайись! Китайись!» И шуткаыс бура школаас отсалӧ. А зонка эд велӧтчис жагӧник. Кончитіс школа. Специальность получитіс. Армияӧ ветліс. Аслас челядь ни эмӧсь. Уджалӧ кыдз колӧ. И фамиллёсӧ кужӧ гижны.

Быдмӧны челядь… Паськалӧны страна пасьта… И быдыс керӧ кытшӧмкӧ бур, колана удж…

Мымда колӧ шонтны нійӧ учӧтувьяныс, мымда разумсӧ да кужӧмсӧ нылӧ сетны! Мымда колӧ терпеннё! Лыддьыны оз позь! Эта понда и сетсьӧ велӧтісьлӧ ыджыт благодарность.

А ме бы ассяням Надежда Юрьевна йылісь содті кывбур:

Аснас сія оз ошшась,

Олан пондаись оз норась,

Чань моз оз чепсась,

«Козерог» кӧть – оз люкась.

Киподас пуктӧм чудо сер!

Пондыв-ко сы моз! Нем он кер!

Вежӧр сылӧн быдса клад…

Диво-инька! Толк да лад!

Вот кытшӧм бытшӧм мортӧс козьналӧмкӧркӧ миян Дӧй ягӧ Ош ыб. Кужӧм бӧрйыны аслыс парасӧ Валька баблӧн нучок Толя, а судьбасис абу сорасьӧм: школаӧ иньдӧм колана велӧтісьӧс.

Ась гордитчӧ Ош ыбыс аслас скромнӧй Парма Нылӧн. Ась сідз жӧ гордитчӧ, кыдз и Мальцева (Вилесова) Надежда Юрьевна Ошибской школаӧн, кытӧн сія велӧтчис, аслас велӧтіссезӧн да мам гортӧн. Кыдз не касьтывны бур кылӧн да не видзны тӧдвылын гортсӧ?! Эд сія чужтіс сійӧ, сувтӧтіс кок вылӧ, зорӧтіс знаннёэз дынӧ кыссьӧм, сетіс медодзза культура навыккез, велӧтіс вежӧртны оланлісь нравственнӧй ценносттез, мӧдкодя шуны, тэчис-мастеритіс под, кӧда вылын быдмис да крепыта видзсьӧ эта морт пытшкын зэв дона качество – интеллигентность.

Юӧррез чужӧны, ӧксьӧны, юӧррез вильмӧны, ыждӧны, юӧррез лэбзьӧны… Талун этӧ бур юӧрсӧ иньдӧ Дӧй ягсянь (ӧннямоз – Доег посад) Мальцева Вера Александровна. Ась паськалӧ юӧрыс омӧн Пармаӧт!

  1. P. S. Уважаемӧй Надежда Юрьевна! Сьӧлӧмсянь тіянӧс поздравляйта славнӧй юбилейӧн! Здоровье тіянлӧ бурӧ да ыджыт шуд! И аслыныт, и быдӧс семьянытлӧ мича луннэз! Мед лоат пыр сэтшӧм жӧ басӧкӧн, югытӧн, кытшӧм ӧні. Мед юрсиныт дыр вачкисьӧ веж гыасян шогді ладорӧ, а синнэзныт мед пыр югьялӧны лӧз дзоридззезӧн.

 

Мальцева В. А.

Добавить комментарий

Ваш e-mail не будет опубликован. Обязательные поля помечены *