Ась етшажык, да буржык

 Вот и бöра локтіс сентябрь. Сентябрь – этö год кытшын символическöй кад, кöр бытьтö саймö гожум кежö онмöссьылöм олан – саймöны челядь саддэз, школаэз, институттэз, аймам, а сідзкö – быдöс страна. И öтлаын нянь-сов йылісь да паськöм-кöмкöт йылісь юрвисяннэзкöт саймöны и мöдкодь думаэз.

Аслас тöждöмöн, кыдз овсьö миян округын коми-пермяцкöй кыв да литературалö, торйöтчö велöтісь, гижись, аслас отир да горт йылісь тöждісись морт Василий Козлов.

– Василий Васильевич, Тійö чужит-быдмит коми-пермяцкöй кыв коласын, коми отир коласын, а сэсся том мортöн муніт Перемö велöтчыны. И бертіт округас овны кыкдас куим год бöрті, годдэза ни мортöн. Кытшöмöн адззит Тійö öння кыв, вежсис я сія?

– Ме дыр эг ов округас, но пыр вовлывлі, кöр кыкись год вылас, кöр – öтпыр. Интересуйтчи кывнас, гижи эта коста коми-пермяцкöй кыв вылын. И пыр адззи, кыдз кылыс вежсьö – рочсялö. И öні рочсялiс сэтчöдз ни – сэсся некытчö.

– Кыдз вежсис эта кадö миян литература? Кыдз сія вильмис? Вежсисö авторрез? Чужисö-зорамисö виль жанррез? Кытшöм вежсьöммез адззат?

– Конечно, локтісö виль гижиссез. Жанррезас? Эта кадöн вильыс содіс етша мый, а сэтшöм жанр, кыдз драматургия – сибдіс. Ежели сія одзжык эшö мымдакö йыліс-зорамис, öні – нач оз зорам.

– Но, шуöны литератураын унажык лоисö басняэз. Драматургия бердö кутчисисö виль авторрез – Анатолий Радостев, Татьяна Савельева. Важ авторрез коласісь мымдакö гижö Василий Климов…

– Драматургия корö ас дынас ыджыт вниманнё, гижиссянь ыджыт удж. А поди театр етшаöв сотрудничайтö гижиссезкöт. Медöддьöн öння литератураын оз гленитчы, что сія пондіс петны часто редактируйттöм. Петасö книгаэз, эм редакторлöн фамиллё, а пондан лыддьöтны – редактор дзик ны вылö дзар абу керöм. А мукöд книгаыс увтö позис бы гижны: «Лэдзöм авторскöй редакцияын».

– Ме рад, что этö казяліт Тійö, мöдік поколеннёись гижись, и од полö горöн эта йылісь висьтавны. Жаль, что сёрöнöв. Кöр эттшöм нетырмöммез йылісь баитлім мийö, ответнас вöлі – оз сетö зорамны виль гижиссезлö. Ме бы эшö содті, что мукöд произведеннёын (кывбуррезын) и редактор нем оз вермы керны – нія эшö нач шогмытöмöсь, кыдз вотöм (зелёнöй) малина. И одзöв нійö петкöтны лыддьöтісь синодзö. Мый керны, медбы художественнöй литературалісь вылынінсö, кöдö колисö миянлö миян классиккез, не лажмöтны? Кöть бы сія литаратураын, кöда петö государство финанссэз вылö. Самиздат книгаэз (этö кöр автор аслас деньга вылö лэдзö ассис книга и ачыс сы понда отвечайтö) ме ог ни баит.

– Мый керны? Авторлöн эстöн винаыс учöт – сія гижö, кыдз кужö, кыдз велаліс и велöтчö. Лыддьöтісь дынö мед локтіс качественнöй литература, сійö колö бурсьöтны профессионаллэзлö. А сідз кыдз литература влияйтö образованнё да воспитаннё вылö, литературнöй процесснас позьö и веськöтлыны. Этö вермас керны издательство, кöда оз понды зависитны авторрезсянь или торья морттэзсянь, а пондас керны госзаказ. И лэдзны медбур произведеннёэз, а опыттöм гижиссезкöт уджавны, кыдз велöтчиссезкöт. А кöр мийö адззам виль лэдзöм книга и юасям: кыдз этö лэдзöмась? Кин ответ видзö художественнöй произведеннёэз качество понда? Кыдз бытьтö деньга кинкö сетöм? И этö колана уджсö керны пондас издательство: тöдны ситуация, велöтны, мый колö лыддьöтісьлö, и зорöтны литературасö быд ладоррезсянь: и публицистика, и художественнöй, и научнöй литература. Кылі, и этнокультурнöй центрын ни пö издательскöй отдел абу. Сэк мый, частнöй морттэз киэз пыр пондіс керсьыны уджыс?

– Ог вермы согласитчыны мукöд функцияэзкöт, кöднö бы Тійö сетат издательстволö (например, сія оз вермы велöтны гижны), но бурсьöтны рукопись, кöдö мöдö лэдзны (обсужденнёэз отсöтöн, рецензияэз отсöтöн) сія вермö, и этö керны колö. А öні бы ме баснисö вуджöта Тіян гижöттэз вылö. Позьö?

– Позьö.

– Василий Васильевич, не öтік мортсянь кывлі, кыдз ошкисö Тіянлісь литературнöй кыв – бытшöм пö, сöстöм, висьттэз кокнита лыддьöтсьöны. И кöр кылі, что Тійö пондöмась велöтны не только роч кыв да литература, но эшö и психология сьöрті, меным жаль вöлі и Тіянöс, и быдöс литературасö. Этöн каднас, кöдöн мортыс пондас тöдсасьны виль предметöн ачыс да велöтны челядьöс, мымда бы вермисö шогмыны виль произведеннёэз – висьттэз, а поди повесть. А кыдз Тійö асьныт думайтат?

– Некокнит висьтавны. Кöр юасьöны, ме шуа сідз: гижисьлöн удж — этö лов понда, сьöлöм понда. А эшö эд мортыслö мыйкö колö сёйны, кытöнкö овны. Кöр оланін оз дöнзьы не енсянь, не государствосянь, сэк колö аслыт небны. А сэсся вештыны кредиттэз, ипотекаэз. А гижан удж – оз сет нельки сьöд нянь кусöк вылö. А то, что кöркö ешті и филологическöй, и психологическöй образованнё получитны, да этö, натьтö, неумöль.

– Петö, гижан удж тіян понда кыдз сьöлöмбурмöтан (рочöн шуны хобби, досуг, увлечение)?

– Гижан удж, некокнит удж. Конечно, вöлі бы менам возможность – унажык кад, гижи бы унажык, кутчиси бы и проза бердö, и драматургия бердö, и ыджыт проза бердö. А гижны гижöм понда, мед «лишь бы мыйкö вöлі» — не ме понда. Ась етшажык, да буржык (качественнöйжык) лоас. Да мыйкö медбöрын частожык юасьла ассим: колö я кинлöкö чужан кыв вылын гижöмыс?

– Миян гижиссез (унажыкыс) уджалісö кык уджын, öтыс основнöй (редактор, врач, фельдшер, велöтісь и с. о.), а мöдыс – гижан удж. Но этö кöркö, сэк гижан удж вöлі не только сьöлöмбурмöт, и вештісö сы понда, кыдз удж понда. Ежели, шуам, öні босьтны Тіянлісь мöдöдз удж (мöд предметсö, психологиясö), да гижан удж и представитны, что нійö донтöны öтмоз, мый бы Тійö бöрйит?

– Ежели бы нія вöлісö öткодь условиеезын (öтмымда кад да вын сетан, да и вештöмын öткодьöсь), кончно, бöрйи бы гижöм.

 

 

Мария Плишкина.

Добавить комментарий

Ваш e-mail не будет опубликован. Обязательные поля помечены *