Огӧ кӧ ас кыв вылын пондӧ баитны, сія чожа кулас

Учёнöйлöн планнэз

Одззася номерын мийö баитім Лариса Пономарёвакöт, кöда чукöртіс ойвывся коми-пермяккезлісь тексттэз да пыртіс нійö торья небöгö. Лариса Геннадьевна, кöть и öні олö Филяндияын, но ловнас се ни горт ладорын и тöждісьö ашыння лун понда.

Сія жалейтö, что Кудымкарын пöднассис научнöй отдел, кöда уна год сьöрна уджаліс коми-пермяцкöй наука зорöтöм понда. Эна годдэзö ученöйезöн вöлі чукöртöм уна полевöй материал, кöдö бы одзлань коліс исследуйтны, уна петісö научнöй статьяэз. Оліс наука, уджалісö ученöйез. А талуння лунö нія янсöтчисö кин кытчö.

— Эм кöторья отирлöн аслас научнöй отдел, сія лоö ыджыт показательöн, что народыс зорамö, кылыс функционируйтö. Позис округын получитны высшöй образованнее, и кыв дынö сьöрна бы вöлі мöдік отношеннё. Статус бы мöдік вöлі, — баитö Лариса Геннадьевна.

Эта шогыс учёнöйöс вайöтіс öтік идея дынö – осьтны научнöй сообщество или организация, медбы одзлань позис зорöтны кывсö да наукасö.

— Колö мыйкö керны, оз ков пукавны, — баитö Лариса Геннадьевна. – Учёнöйезлö колö уджавны öтласа, чукöртчывлыны öтлаö, баитны проблемаэз йылісь, мый талуння лунö лоö актуальнöйöн, мый лоас ашын. Бур, что керöны конференцияэз, кытöн миян ученöйез вермöны кывзын мöдікеезöс, мыччавны коми-пермяцкöй отирлісь наука.

Но наукаын пыр эм мый вылын уджавны, торйöн ни коми-пермяккезлöн кыв вылын. Сы шуöмöн, колö уджавны терминнэз вылын, медбы кылыс вöлі сöстöмжык, активнöя нійö пыртны сёрниö. Аркмöтам кö виль кыв, медбы эз вöв öтдортöм (отторженнё), негативнöй отношеннё. Колö кыввесö лöсьöтны асланым кыв средствоэзöн.

— Огö кö асланым кыв вылын пондö баитны, сія чожа кулас, — шогсьö учёнöй.

Медбы эта эз шогмы, колö национальнöй политикасö лöсьöтны сідз, медбы сія дорйис кывнымöс, но медбы керны языковöй политикасö, колö чулöтны социологическöй исследованнёэз, кöдна бы мыччалісö, кытшöм ситуацияын миян кывным öні.

— Медбы власть мыйкö вермис керны, колöны статистическöй даннöйез, колö активнöя уджавны социально-лингвистическöй направленнёын. Мый керö власть? Кыдз отир относитчö кыв дынö? Мыля челядь дугдіс баитны комиöн? – эна вопроссэз вылö ответитас исследованне. Сэк пондас тöдчыны, мый колö керны кыв понда.

Но медбы керны исследованнё, колö сьöм. Ученöй шуö, что бöрья годдэзö ыджыт роль учёнöй уджын пондісö орсны проекттэз, медбы лэдзны небöггез, ветлыны экспедицияö. И только гранттэз вылö позьö лэбтыны наука. Но эта вылö тожö колöны тöдöммез, эд гижны проекттэз, дойисьны ны сьöрті, отчитайтчыны колö кад. Учёнöйлö колö аслыс кошшыны ас понда сьöм, медбы реализуйтны кытшöмкö удж.

— Наука и организаторскöй удж – некыдз öтамöдкöт озö лöсялö, — баитö учёнöй. – Учёнöйлö колö пукавны библиотекаэзын, кошшисьны книгаэзын, либо ветлöтны экспедициаэзын, а сія кошшö сьöм.

Колö шуны, что наукаын, а торйöн ни коми-пермяцкöй наукаын уна и уна эшö «чочком дöмассэс», волькöтны нійö ковсяс не öтік дас год. Мый одзлань виччисьö коми-пермяцкöй кыв, кытшöм сылöн одзланься олан, оз висьтав некин, пока мийö асьным сы ладорö огö бöр бергöтчö чужöмнаным.

 

Ирина Дульцева. Фото автора.

Добавить комментарий

Ваш e-mail не будет опубликован. Обязательные поля помечены *