Лариса Пономарева: «Ӧддьӧн бур, что ме энӧ тексттэсӧ ӧкті»

Неважын петіс Лариса Геннадьевна Пономаревалöн, филология наукаэз сьöрті кандидатлöн монография– «Ойвывся коми-пермяккезлöн сёрни» («Речь северных коми-пермяков»).

500 страница вылö чукöртöма материал куим диалект сьöрті: кочевскöй, косинско-камскöй да мысовско-лупьинскöй. Уна пыртöма текстовöй материал, кöда лоö познавательнöйöн не только ученöйезлö, но и велöтіссез да велöтчиссез понда.

— Сідз кыдз ме аспирантураын велöтчикö гижи ойвывся коми-пермяккезлöн мысовско-лупьинскöй диалект йылісь диссертация, сэксянь жö, 1999 годсянь, ме понді öктыны диалектнöй тесттэз, — баитö Лариса Геннадьевна. – Диссертация дорйöм бöрсянь локті уджавны Перемö, педуниверситетö. Перемас уджалікö, и тöлöн, и гожумöн, кыкись годнас ме ветлöтлі экспедицияэзö, öкті материаллэз, тексттэз ойвывся районнэзісь (Гайскöй, Косинскöй, Кочевскöй). Кöр ветлывлі öтнам, кöр и студенттэзкöт. Медодзза экспедицияас ме ветлі эшö аспирантураын велöтчикö. Висьтала ыджыт спасибо эта понда Ольга Петровна Аксеновалö, филология науказлӧн кандидатлö. Сідз кыдз отирыс, кöда баитö мысовско-лупьинскöй диалект вылын, олöны öддьöн ылын, шедны ны дынö вöлі сьöкыт.

Книга вылын Лариса Геннадьевна уджалöма 1999 годсянь 2015-öт годöдз, дыр я, не я – быдöссö 16 год. Вöлісö и удж дорись орöтчöммез, кöр учёнöй уджаліс мöдік муэзын — Венгрияын да Финляндияын, сэк етша сюрліс ветлывлыны экспедицияэзö.

Книгаын быдöссö 760 текст, пырисö сідзжö кочёвскöй (218 текст) да косинско-камскöй (312 текст) диалект сьöрті тексттэз. Мысовско-лупьинскöй диалектісь босьтöм 230 текст.

Небöгын эм неыджыт теория тор, кин да кытшöм уджжезын гижöм ойвывся коми-пермяккезлöн сёрни йылісь, сэсся неыджыт торöн сетсьö ойвыся коми-пермяккез сёрнилöн ассямаыс, мыйöн торьялö кочевскöй диалект мöдік диалекттэзсянь, и быд диалектлöн характеристика да особенносттез.

— Гижи, кыным коми-пермяк олö нія территория вылын, и петіс сідз, что Гайнскöй районын мысовско-лупьинскöй диалектыс вылын баитöны етша ни, и олöны етша ни коми-пермяккес. Кыдз висьталісö Кебратскöй поселленнись советын, öння кадö (2015 годö) сэтчин олöны 760 морт ни только, кöдна баитöны сія диалект вылын. öддьöн бур, что ме энö тексттэсö öкті, и нылöн сёрниыс кольччис. Эшö год — мöд, и натьтö, сьöкыт лоас адззыны морттэсö, кин бы баитіс бытшöма сія диалект вылын.

Книга «Речь северных коми-пермяков» чужис 2015 годö, кöр учёнöйлö Финляндияын сетісö эта проект вылö сьöм, медбы ветлыны экспедицияö. Эм сэтшöм Коне Фонд, кытчö коліс гижны проект вылö заявка. Сетöм деньга вылö Лариса Геннадьевна тексттэсö гижис кириллица да латиница вылын, сэсся вуджöтіс роч кыв вылö, гижис теория, керис картаэз, вештіс типографскöй расходдэз.

Лариса Пономарева ачыс распространяйтö книгасö, сеталö учёнöйезлö, пыртö да ысталö библиотекаэзö. Тиражыс абу уна, 100 экземпляр, но книгаыс ценнöй сійöн, что чукöртöм тексттэз пыр кеж кольччасö татöн фиксируйтöмöсь, и кöр куим севернöй диалект вылын етша отир ни пондас баитны, сёжö позяс осьтны книга и лыддьöтны эна диалекттэз вылын.

 

Ирина Дульцева, фото автора.

 

Добавить комментарий

Ваш e-mail не будет опубликован. Обязательные поля помечены *