И удж, и хобби

Кудымкарскöй районісь том активист Василий Епанов мыччасис Коми телевиденнё вылын.

Василий Епанов вöлі «Önet» том отир понда программалöн геройöн. Передачаыс петіс март 24 лунö. Василий висьтасис аслас удж йылісь, кыдз сія зорöтö коми-пермяцкöй кыв интернетын. Висьталіс, что коми-пермяцкöй кыв учöтсянь бура тöдö, велöтö и вермö сёрнитны. Но кылыс дынö радейтöм ёнжыка «öзйис» сэк, кöр поступитіс велöтчыны Пермскöй университетö, сідз кыдз вöлі öддьöн гажтöм. öні Василий зорöтö коми-пермяцкöй кыв Интернетын. Сылöн сэтöн куим листбок: «Тупи-тап», «Кывбуррез» да «Учим коми-пермяцкий». Медодзза листбок вылас мыччалö демотиваторрез, серамбана гижöттэз, татöн подписчиккес 5 тысячася унажык ни. «Кывбуррез» листбок вылын пыртö коми гижиссезлісь-классиккезлісь произведеннеэз, а сідзжö том гижиссезлісь. Но ачыс жö шуö, что томмез етша пондісö коми-пермяцкöй кыв вылын гижны. Медбы том отир паськöтіс ассис тöдöммез кыв сьöрті, вöлі чукöртöма эшö öтік группа «Учим коми-пермяцкий». Картинкаэз сьöрті, учöтик тексттэз да вуджöтöммез сьöрті кокнитджык лоас велöтны коми кыв.

Василий Епанов не только коми-пермяцкöй кыв паськыта велöтö, но и коми-зырянскöй да удмуртскöй кыввез. Энö кыввесö совершенствуйтö годісь-годö, и нельки гижö ны вылн диктанттэз. Эна регионнэзын (Комиын да Удмуртияын) Василийлöн эму на ёрт, кöднакöт сія сёрнитö ны кыввез вылын. Коми-пермяцкöй кыв зорöтöмсö сія лыддьö уджöн и хоббиöн.

—  Менам Карбас деревняын, кытöн ме ола, тшöктöны, медбы ме одзлань нуöті энö листбоккесö, колö, медбы гораліс коми кылыс не только ас коласын баитікö, но и Интернетын, и медбы томмез унажык гижисö öтамöдлö чужан кыв вылын, пуктісö коми раскладкаэз, кöдна эмöсь ни. Передачасö позьö видзöтны https://vk.com/yurgankomi вылын.

 

Фото с личной странички Василия Епанова в соцсети «Вконтакте».

Добавить комментарий

Ваш e-mail не будет опубликован. Обязательные поля помечены *