«Эстӧн позьӧ серавны». Кыдз драмтеатрись синхронист Алексей Никулин ваксьӧ роччеслӧ пеллезаныс коми спектакллез вуджӧтікӧ

Драмтеатрись синхронист Алексей Никулин вуджӧтӧ роччезлӧ коми спектакллез мӧдӧдз год ни. Сы уджын колӧ не только бытшӧма вуджӧтны сцена вылын сернитӧмсӧ, но и колӧ медбы эз ӧш геройлӧн образыс. Сійӧн наушниккез пырйӧт позьӧ кывны Алексейлісь не только голос, кӧдӧ сія вежлӧ то кыз вылӧ, то вӧснит вылӧ,  но и сералӧм, и горзӧм.

Никулин
Алексей Никулин шуӧмӧн медкокнит вуджӧтны «Гузи да Мези», тӧдса быдӧс. Мукӧдпырся вуджӧтісьыс нельки пӧрттчывлӧ артистӧ — вежлавлӧ голоссӧ. То пиксӧ Мезиӧн, то баксӧ Гузиӧн. А то и ваксьӧ отирыс пеллезӧ.

Алексей театрын не случайнӧй морт. Сылӧн опытыс — орсны сцена вылын мунӧ эшӧ педучилищесянь, кытӧн ӧтлаын режиссер Вениамин Соколовкӧт студенттэз сувтӧтлісӧ быдкодь спектакль: и классика, и челядь понда сказкаэз. Уна год Алексей Семенович уджаліс дикторӧн местнӧй телевиденнёын. Сійӧн, кӧр Алексейлӧ театрись директор вӧзйис вуджӧтісьлісь удж, сія согласитчис сэк жӧ. И вот виль зданнёын Алексейлӧ сетӧны вуджӧтны медодзза спектакль «Кӧдзыт гожум».

— Спектакльыс кык кыв вылын, коми-роч, сійӧн эмӧсь неыджыт перерыввез, эм, кӧр лӧсьтчыны, видзӧтны одзлань сценарий, — баитӧ Алексей Семёнович.

«Кӧдзыт гожум» бӧрсянь лоисӧ эшӧ спектакллез. И быдыс ны коласісь аскодя, кытӧнкӧ колӧ драматичнӧй сценаэз вуджӧтны, кыдз «Капа, Кузика, Парась до Маня», кытӧн и комичнӧйӧсь «Гузи да Мези» да «Куим ӧткодь». Но эм дзир классическӧй спектакль — Гоголь сьӧрті «Гӧртасьӧм». Ежели одззася спектакллезын позьӧ мыйкӧ ассянят содтыны, эмоцияэзӧн тыртны, то бӧрьяас, кыдз баитӧ вуджӧтісь, он ни веж текст ас сьӧрті.

— Классическӧй текст вуджӧтны ӧткӧ сьӧкытжык, мӧдкӧ — кокнитжык. Кокнит сысянь, что тексттэс актеррезӧн велӧтӧмӧсь бура, етша кин импровизируйтӧ, сійӧн баитан готовӧй текст сьӧрті. Но, мӧдӧрсянь, он лысьт керны ошибкаэз, видзӧтіссез коласісь унаӧн эд тӧдӧны «Женитьбасӧ», — содтӧ Алексей. – А «Гузи да Мезиын» ме «купайтча». Сія гижӧм бытовӧй кыв вылын, кӧда учӧтсянь меным тӧдса.  Геройез диалоггез пырйӧт колӧ вайӧтны роч отирӧдз коми-пермяцкӧй оланісь колоритсӧ, медбы адззисӧ сійӧ не только сценкаэзын, но и кылісӧ сёрниын, сійӧн верма и голосӧс вежны: кӧр Мези баитӧ – вӧснитик голосӧн баита, Гузи — кызжык да пыдынжык голосӧн. Овлӧ, гажа сценаэз мунікӧ и ог вермы терпитны да отир пеллезӧ серавла. Гузи да Мези – мунӧ подъём вылын.

Гузи
«Мезиыс лӧгасис, что сылӧн жӧникыс, Гузиыс, бӧбӧтлӧ Потикасӧ да пондіс вежӧктыны: Мези: — Менам синнэз одзын ни пондін малавны ассит Потикатӧ, ме тэныт мыччала, кыдз киэтӧ нюжлавны да менӧ ылӧтлыны…» «Мези приревновала своего мужа Гузи к соседке Потихе и обозлилась на него: Мези: — Ты уже на моих глазах стал Потиху обнимать, обсмеивать меня, ну, старый, я тебе покажу…»

Кыввезӧн вуджӧтісь тожӧ «орсӧ». «Куим ӧткодьын» аскур вуджӧтӧ кыдз настойка, крепкий напиток, самогон. А кӧр и вунӧтлывлӧ кыввез. Шуам, тӧд вылісь ӧшӧмась кыввез «чӧрс» и «сьӧктан».

— Некыдз вот эг вермы тӧд вылам уськӧтны, кыдз нія рочӧн, сійӧн коли вуджӧттӧг, мый лоас, сія и ло, — баитӧ Алексей. – Но эта вӧлі единичнӧй случай, а сідз ог халтурит, старайтча, медбы быд кылыс, выраженнёыс вӧлі вуджӧтӧм, ась не буквальнӧя, но смысловӧя.

Алексей Семёнович шуӧ, что велалӧма ни эна спектакллез дынӧ. Быд пырся, кӧр вуджӧтӧ «Гузи да Мези», петӧ смех, а вот «Капа, Кузика, Парась да Маня» спектакль, кытӧн мыччасьӧны  инькаэзлӧн сьӧкыт судьбаэз, синнэз вазьӧны.

Быд спектакль одзын Алексей аслас будкасянь, кытӧн сія пукалӧ театрас, смекайтӧ, уна я локтіс отир видзӧтны коми спектакль, и быдпырся адззӧ тыр зал. А сідзкӧ, уджыс синхронистлӧн оз на помассьы, эд лоас мый бӧра висьтавны роччезлӧ миян, комиэз, йылісь.

Ирина Дульцева

Добавить комментарий

Ваш e-mail не будет опубликован. Обязательные поля помечены *