Парма ру: томпӧлӧс бӧра сералісӧ

Коми кыв оз кус не оланын, не сцена вылын, эмöсь кö сылöн одзланься нуöтіссез. Сідз позьö висьтавны коми-пермяцкöй кыв вылын КВН видзöтöм бöрсянь, кöда чулаліс апрель 28 лунö Коми-Пермяцкöй этноцентрын. А фавориттэзнас эта лунö квать команда коласісь лоисö «Мелкие Ёгвуси», кытöн орсöны дзир 10-годся нылочкаэз да зоночкаэз. Нія только кынымкö баллöн кольччисö маститöй, вына белоевскöй «5D»-ись, локтас кад, и нія керасö, кыдз асьныс шуöны, «бац-бац», белоевсасö.

А белоевса эта орсанын немымда эзӧ шогсьӧ, эд нія кыкьямыс год ни «шупкасьӧны» шуткаэзӧн сцена вылын. А таво тулыснас нельки КВН сьӧрті краевӧй турын лоисӧ мӧдӧдззезӧн. Кытчӧ ни ныкӧт вермасьны, сідз бы поди шуис быд команда, но эта вылӧ видзӧттӧг, локтісӧ-таки орсан вылӧ.
И сідз, сцена вылын «Кувинский томпӧлӧс» (с. Кува), «Гиль-голь» (с. Верх-Иньва), «Аканёк» (с. Пешнигорт), «5D» (с. Белоево), «Serva» (д. Малӧй Серва), «Мелкие Ёгвуси» (с. Ёгва). Жюриын – тшӧтш коми кыв радейтіссез. Председательыс – Ольга Радостева, кӧда организуйтіс этӧ орсансӧ Кудымкарскӧй районын.

Медодзза конкурс – «Визитнӧй карточка», темаыс – «Пыра интернетӧ, чапка SMS-ка» – томмезлӧ тӧдса, сійӧн нія сералісӧ эстӧн пӧттӧдз. Сервинскӧй команда мыччаліс пӧриссезлӧн соцсетьын ёртасьӧм. И нельки нимыс командалӧн шуис, что колӧ серавны, вежны кӧ кык шыпас (буква) местаэзнас, петас «Serav». Или «Ёгвусилӧн» шутка: «Мымда тэнат гегабайт компьютерат? Эг на меряйт, сапоггезӧ абуӧсь».
Разминкаын коліс мыччавны коми-пермяклісь эрудиция. Быд команда сетӧ ӧтік вопросӧн, и быд командалӧ колӧ сетны шуточнӧй ответ. «Аканёк» юалӧ: «Мыля коми-пермяккезлӧн ӧнӧдз абу соцсеть?» «5D» паныт шыасьӧ: «Тэ мый баитан, быдӧс отирыс пистикалӧны…». «Мелкие Ёгвусилӧн» вариант: «КВН-ыс разь не соцсеть, видзӧт, кыдз эстӧн зависают».

Музыкальнӧй заданнёын КВН-щиккез мыччалісӧ сьылӧмын да йӧктӧмын вын. Кувинса орсісӧ гитараэзӧн, «Гиль-голь» – пуовӧй музыкальнӧй инструменттэзӧн, «Ёгвуси» бӧрйисӧ, кинлӧ колӧ мунны «Евровидение» вылӧ.

Эта конкурс бӧрын жюри керис итоггез. Мед-одзза места вылӧ, кыдз и шуисӧ, петіс «5D» команда, кынымкӧ балл вылӧ кольччисӧ ны сьӧрись «Мелкие Ёгвуси» и босьтіс мӧдӧдз места. Куимӧт места дӧнзис кык командалӧ: «Гиль-голь» да «Кувинский томпӧлӧс». Орсан бӧрын чулаліс «разбор полётов». Эд КВН-ӧн тожӧ колӧ кужны орсны и орсны кужӧмӧн. А Ольга Радостева сьӧрті, медбы петіс бур орсӧм, колӧ, мед сія уджыс тіянлӧ аслыныт гленитчис.

Ирина Дульцева

Добавить комментарий

Ваш e-mail не будет опубликован. Обязательные поля помечены *