Медбы чужӧм гӧрдӧтіс

Талуння сернитӧм мунас Нина Исыпова йылісь, кӧдакӧт мийӧ пантасьлім эшӧ 2011 годӧ. Олӧ Нина Егоровна Ваганова деревняын. Кӧр мийӧ локтім Вагановаӧ, юасим, эмӧсь ли татӧн мастерицаэз, кӧдналӧн бы кисиныс петіс кытшӧмкӧ важся ремесло – половик нето чышкӧт кыйӧм. Сэк миянӧс ыстісӧ Нина Исыпова дынӧ, уджаліс сія Вагановскӧй федьдшерскӧй пунктын. Казялі, инька ӧддьӧн боёк, и кӧт пора котӧртліс гортас да вайис быдса кисой аскыйӧм чыш-кӧттэз. Оз веритсьы, что эттшӧм том морттэз озӧ ӧштӧ маммезныслісь да баббезныслісь ремеслоэз. Нина Егоровна кипод увтісь петӧма не ӧтiк дас чышкӧт. Сэк сія кык год ни кыдз абу пуксьылӧма станок сайӧ, кадыс, шуӧ, абу лоӧма, но техникасӧ, кыдз кыйны, сярзьӧмӧн висьтасис.


Screenshot_19Чышкӧт кыян станокыс сулалӧ мамыслӧн важ керкуын, а сы кулӧмсянь дас год ни кыдз чулалiс. Мамыс жӧ и сибӧтлӧма нывсӧ эта удж дынӧ. Вит челядь коласiсь Нина нылыс кутчывлӧма и пансьыны, и пысасьны, и кыйны, и серӧтчыны. Кыдз баитӧ мастерица, учӧтсянь пӧ этӧ уджсӧ тӧдлi. Нельки лунтырӧн станок сайись абу чеччывлӧм. Луннас, кӧр нылыс уджалӧ, чышкӧттэз кыйӧ мамыс, а кӧр Нина удж вылiсь локтӧ – порогсянь пуксьӧ кыйны серсӧ. Кӧр аслас челядь лоисӧ, нiя ни пондісӧ отсасьны. Пуксясӧ да шваткӧны-кыйӧны. Но серсӧ Нина ӧктывлiс только ачыс. Сiйӧн быд чышкӧт вылын аслас торья сер. Овлiс и сэтшӧм тор, кӧр серыс эз аркмвлы, ковлiс резьӧтны быдӧс бӧр. И бӧра кыйны вились. Кӧдна чышкӧт- тэзӧн чужӧм да ки чышкыны – сэтчӧ серыс мунiс поснитик, а енджадж вылӧ ӧшӧтансӧ гырись серрезӧн серӧтлісӧ. А кӧр мамыс пӧрисьмис, Нина ас вылас босьтiс и пансян, и пысасян, и кыйсян уджсӧ.
Чышкӧт кыян технологияыс ӧткодь половик кыянкӧт. Только чышкӧтсӧ колӧ кыйны сунисiсь. Суниссэсӧ кӧркӧ етша вузавлісӧ, но мастерицаэз судзӧтлісӧ быдлаись. Кин кытчӧ только ылӧжык мунас, Нина Егоровна сё ни закажитлывлiс вайны «дефицитнӧй товарсӧ». А ӧнi суниссӧ вузалӧны тырмӧмӧн – пуксьы да кый. Но эд озӧ! Эшӧ одзжык, кӧр и сунисыс эз на вӧв, Ниналӧн мамыс чышкӧтсӧ кыйлiс ленiсь, кӧдӧ вӧдитлiс ачыс. Перво сiйӧ сыналас да печкас. Чышкӧттэс нiя нежык чочкомӧсь, но уна год бӧрті рӧмсӧ, не прочностьсӧ абу ӧштӧма.
– Мамӧ сё тшӧктывліс чышкисьны дӧраовӧй чышкӧтӧн, медбы рожа пӧ гӧрдӧтіс, – баитӧ Нина Исыпова. – А то шуӧ, челядь, рожаныт чочком. Чышкисян – чужӧмӧт и быль вир пондӧ ветлыны.
Ӧтiк семья Вагановаын и только кыйлывлiс чышкӧттэсӧ. Унаӧн пӧ кутчывлӧмась да только мыланыс бырлывлӧма чожа. А серӧтчывлiсӧ нельки быд керкуын. Нина Егоровна и часӧт бы пуксис да шваткис-кыйис.
– Сiя нем абу туйын, – оз паныт сувт уджлӧ морт. – Этӧ мийӧ ӧнi дышмимӧ ни, магазинас быдторсӧ пондiсӧ вузавны да.
Ниналӧн мамыслӧн вӧлӧмась вит челядь да ӧні 45 нучок-нучатка. Быдӧннысӧ ны коласiсь бабныс «снабдитӧма» аскыйӧм чышкӧтнас. Ась пӧ память кольччӧ. И ӧнi, кӧр локтӧны бабныс шойна вылӧ, пыр ни ольсалӧны чышкӧттэз да пым черинянь дорын касьты-лӧны бабнысӧ, сылiсь кужись киэсӧ.

Ирина ДУЛЬЦЕВА

Добавить комментарий

Ваш e-mail не будет опубликован. Обязательные поля помечены *