Мича Парма: Кыдз лёнісь шогмӧ дӧра

Верх-Иньваись «Весёлые бабульки» коллектив ӧддьӧн радейтӧ коми-пермяцкӧй традицияэз. Местнӧй музейын эмӧсь уна важ предметтэз, кӧднӧн нылӧн аймаммез керлӧмась быдкодь гортся удж. Музейись посетителлезлӧ, а частожыксӧ овлӧны школьниккез, гленитчӧны предметтэз, кӧднӧн уджавлӧмась лен вӧдитікӧ. Челядьлӧ музейлӧн руководитель Людмила Ермакова коллективись участниккезкӧт висьтасьӧ технология йылісь, кыдз лёнісь шогмӧ дӧра.

Людмила Ермакова:
— Кӧдзӧны лёнсӧ ӧні, конечно, не сідз, а кӧркӧ кӧдзлісӧ кудсянь. Куддэсӧ голяаныс ӧшӧтасӧ, мунӧны и кӧдзӧны. Лёнсӧ нетшкасӧ, сэтчин процессыс эшӧ ӧддьӧн ыджыт. Кӧдзыссӧ колӧ ӧктыны, одзжык ольсавлісӧ ӧн или дӧра, увтас пуктасӧ тёс, тёс вылас пуктасӧ кӧдзыссэсӧ, вевдӧрсяняс веввтясӧ тожӧ дӧраӧн, и нӧшӧн сырйӧны. Кӧдзысыс киссьӧ.
Марина Алексеевна:
— Потом лёнсӧ баняын косьтывлісӧ, сэсся сійӧ нярьялӧны нярьянӧн. Лёныс ёгья лоас, потом пыркӧтӧны, зуалӧны зуӧн.
Людмила Ивановна:
— Ме, конечно, эг этӧ уджсӧ керлы, бабӧ керліс быдӧс. Эта шусьӧ пыркӧтчан. Кӧр нярьясясӧ, небзьӧтасӧ ӧддьӧн, ёгсӧ , страмсӧ колӧ сэтісь убирайтны пыркӧтчаннас.
Галина Николаевна:
— Эта зу, ме сійӧн сынасьлі, расческаэс эзӧ вӧлӧ. Зунас сынавны колӧ лён содз. Сійӧ бура сыналан, и сія сӧдз лоас пӧ. И сэсся сійӧ печкасӧ, вӧлись кыйӧны сэтісь йӧрнӧссэз да чышкӧттэз. А ме 50-ӧй годся, но нярьясьлі ни.
Лия Герасимовна:
— Мийӧ этӧ уджсӧ керим ни, и дӧрасӧ кыйим, печкывлім. Вот эта кудель, эта печкан, эта шӧрт. Эта умӧль шӧртыс, мешӧккез только кыйны, а бур кӧ, чышкӧттэз да йӧрнӧссэз кыйлісӧ. А эшӧ эм «крючонка» — медбур сія, медвӧснит. Сэтісь пӧ только поппезлӧ кыйлӧмась чышкӧттэз. Сэсся пӧимӧн чочкомтлісӧ, пӧжлісӧ кунваын. Кӧркӧ воннесӧ мый дӧраовӧйӧсь керлісӧ.
Зоя Константиновна:
– Сыбӧрын печкисӧ, ӧні кыйны лӧсьӧтчам. Вот эта аньбаба. Аньбаба вылас эмӧсь аньборддэз. Эта трубича, сэтчӧ мийӧ каттямӧ шӧртсӧ. Сновальня вывсис керӧны ректаннэз, нія кишка кодьӧсь. А сэсся пондӧтчам кыйны дӧрасӧ.

Людмила Яковлевна шуӧ, что важ традицияэз пӧрисьжыккез сеталӧны томмезлӧ. Нія вовлӧны музеяс, видзӧтӧны и быдӧс асьныс ни кужӧны керны. Быд год музей оградаын быдмӧ лён, медбы сэтісь керны заготовкаэз да мыччавны процессӧ музейӧ локтіссезлӧ.

Ирина ДУЛЬЦЕВА

Добавить комментарий

Ваш e-mail не будет опубликован. Обязательные поля помечены *