Син колӧ да мыла колӧ

Кыйны йи да кушак чожа лоас некинлӧ

Серафима Шипицына йылісь, кӧда олӧ Фадеева деревняын да кыйӧ кушаккез, мийӧ гижлім ни асланым газетаӧ, инькалӧ сэк вӧлі 78 год. Чулаліс год да джын, ӧні мастерицалӧ 80 гӧгӧр. Ог тӧд, кыйӧ ли оз ли Серафима Самсоновна кушаккез да йыэз ӧння кадӧ, но сылісь рӧма пӧкрӧммесӧ позьӧ адззывны нельки Кудымкарись кафеын.
– Ме «Блюзас» ӧддьӧн уна нӧбӧті, метров 30, – баитӧ Серафима Самсоновна – быдӧс вузалі, кӧда вӧлі. Татьяна Надымовалӧ уна нӧбӧтлывлі вузавны, медбӧрьясис штук 15.
– А кытісь велаліт кыйны кушаксӧ?
– Менӧ мамӧ велӧтіс.
– А серсӧ тожӧ мамныт велӧтіс?


– Кӧс сія. Меным вӧлі 11 лет, кӧр понді кыйны. Сой менам жӧник вылӧ муніс, да сія менам кушаккезӧн козьнасис. А сэсся менам тӧд вылам эз вӧв, что кыйны колӧ. Уджалам да, жӧник вылам петі ни, челядь быдті. А кӧркӧ кевьяӧлӧн моньыс, Батинісь вӧлі, вайӧма бабалісь йи, поди пӧ кужас кинкӧ кыйны. Ноко, ноко, мыся, вай, ме видзӧта. Сійӧ кӧрыс кӧс сейӧма да дженытик йыокыс лоӧма. А кевьяӧлӧ шуа, мыся ог ни видзӧт, ме, мыся, этійӧ кыйлі и сідз кужа, видзӧттӧг. Сысянь понді бӧра и кыйны. 20 лет ни кыя.
– Ноко, мыччалӧ…
– Этчӧ пукся, вожася, этчӧ подушка пукта. Этчӧ домалан, сійӧ пуктан, лэбталан, лэдзалан, ӧтӧрӧ лэбтан, мӧдӧрӧ. Бӧрьян – чапкан, чуньӧн колӧ бӧр-йыны… Пукавны колӧ, син колӧ, мыла колӧ.
– А эта серыс кыдз шусьӧ?
– Ме мыйӧн тӧда, катша кок пӧ некӧ. Ме важ йыись серсӧ кери. А сякӧй чужӧмыс эм жӧ.
– Челядьсӧ велӧтіт кинӧскӧ?
– Ме школаӧ кайлі велӧтны, да эзӧ велӧтчӧ, нывкаыс ӧтікыс ӧддьӧн мӧдіс велавны, да школасис петіс, сэсся абу кыйӧм. А нучаткаэзӧ озӧ жӧ велӧтчӧ. Вовлісӧ Свердловсксянь снимайтны, велалӧмась жӧ кыйны, меным пыр иньдӧны открыткасӧ. Спасибосӧ висьталӧны.
– А пондат кыйны эшӧ?
– Нюжавны луныс пондас да окотита бӧра кыйны. Мыся, горӧ шента швейкасӧ, да поди эшӧ верма кыйны. Думайта, эшӧ станоксӧ пыртлыны кушаксӧ кыйны и…
Вот сэтшӧм сернитӧм чужис Серафима Самсоновнакӧт, кӧр колян годӧ кайлім видзӧтны мастерицалісь кужӧмсӧ. Колӧ шуны, что одзза поколеннеэзлӧн кипод уджыс вӧлі, кыдз шуасӧ, вираныс. Эд магазиннэзын нем эзӧ вузавлӧ, коліс быдӧс керны ас киӧн: и жӧник сайӧ петан паськӧмсӧ вурны, и приданӧйсӧ, и козиннэсӧ. Не весь шувлісӧ, кӧда ас киӧн пӧ керӧм, сія пӧ мед ни басӧк да сьӧлӧмви.

Ирина Дульцева

Добавить комментарий

Ваш e-mail не будет опубликован. Обязательные поля помечены *