Том гижиссез пантасисӧ оча кыв

Коми-Пермяцкӧй окружнӧй краеведческӧй музейын чулаліс кывбур-батл, кытӧн том гижиссез вермасисӧ нёль номинацияын: «Ме йылісь!, «Менам горт», «Радейтӧм» и «Содты висьт». Куимнан авторыс (Анна Кривощекова, Ання Васькина да Ирина Дульцева) бура лӧсьӧтчӧмась конкурсыс кежӧ, нія лыддьӧтісӧ ассиныс кывбуррез музейӧ локтіссезлӧ. Корам и тіянӧс донтны нылісь творчество.

 

Валёнки

Ок валёнки ті, валёнки!

Руд вуруновӧй сапог!

Мымда коккесӧ тэ шонтін,

Лыддьынытӧ верма-ог?

Баля шыри да вурунсӧ

Пимокатнӧйӧ кайӧті.

Сія кадсянь кын кок чуньсӧ

Да зырымсӧ ме вунӧті.

Нійӧ ӧддьӧн бур кӧмавны –

Гор вывсянь чеччӧвті-сюри,

Оз ков воннесӧ кӧртавны,

Дозирайтны оз ков бура.

Косьті да бӧра ни новья,

Гуталин немымда эг видз,

Нійӧн кӧть ӧтӧрын тӧвья,

Не мороз, не лымыс оз видз.

А свиданнё вылас ойӧн

Бимороз коста котӧртны

Уггиэзӧн ог эд понды,

Верма бӧрлань и не бертны!

«Ӧні валенки не в моде, —

Шуас паныт молодёжыс-

Саоги к любой погоде

Приспособлены пӧ всё же»

Разь валёнкиыс не басӧк?

Волькыт, гӧна, паськыт ныра.

И не ӧддьӧн каблукастӧй,

Подойдет к любой фигуре.

Важ валёнкиэз кӧмалі,

Дискотека вылын йӧкті.

Сэсся ӧтӧрас петалі,

Кын кокучуннезнысӧ ӧкті.

Бӧббез кынмӧмась «по моде»,

Оча пинь оз и павкалӧ,

Ме не самӧй моднӧй, поди,

Пар валитӧ-сідз жаралі!

Муна «Моднӧй приговорӧ»,

— Новйӧ валенки, — висьтала,

Чтоб до всей страны допёрло:

В них тепло! Я проверяла!

Анна Кривощекова, Архангельск посад Юсьвинскӧй район

 

Менам чужанін

Радейта ассим чужанін,

Эд сія зарниа, кыдз асыв,

Любуйтчӧ сійӧн ті кӧть кин-

Кывбурыс кокнита ольсассьӧ.

Ме понда дона чож шорок,

Кӧда кырас бокӧт котӧртӧ,

Радейта визыв югӧрок,

Кӧда виль лун йылісь юӧртӧ.

Сьӧлӧм вӧрзьӧтӧ Иньва ю

И тшӧктӧ ловӧс менчим сьывны,

Кытшӧм бы кыввез тэ эн шу,

А этӧ колӧ дзир адззывны.

Сёгодся рассэз, ыббез, вӧр

Радейта буржыка быд лунӧ,

И басӧкыс, мый ме гӧгӧр,

Сьӧлӧмись оз ни вермы мунны.

Радейта асывся лысва,

Мед тыр кырыммезӧн гумавны,

Уськӧтны гажӧтан синва

Да чужанінӧлӧ радъявны.

Ме донта рытся сӧстӧм ру,

Кӧр шондіыс гӧглянӧн лэдзчӧ,

Ме донта ассим Парма му,

Эд сысянь мирас дӧс пондӧтчӧ.

Анна Васькина, Кудымкар

Добавить комментарий

Ваш e-mail не будет опубликован. Обязательные поля помечены *