Суса да кись – быдман кужись. Дёмина деревняын лэбтӧны важся ремеслоэз

Кудымкарскӧй районісь Демина деревняын уна керкуын кылӧ кисьлӧн шваткӧтӧм да поталяннэзлӧн дзуртӧм – этӧ инькаэз кыйӧны половиккез да чышкӧттэз. Ремеслоыс колана, шуӧны деминса, кыйсям пӧ кыдз заказзэз сьӧрті, сідз и вузалӧм понда. Уджыс деревняын абу, а овны-бергавны мыйкӧ вылӧ колӧ.

Татьяна Трушникова кипод увтісь петӧны бытшӧм салфеткаэз да паськӧм элементтэз.
Татьяна Трушникова кипод увтісь петӧны бытшӧм салфеткаэз да паськӧм элементтэз.

Татьяна Трушникова пенсия вылын ни, уджавлӧма посадас медикӧн. Ӧні ас пондасис осьтӧ виль увлеченнёэз, ӧтікыс ны коласісь – половик да чышкӧт кыйӧм. Татьяна Андреевна керкуын станокыс сулалӧ «почётнӧй» местаын, сія бытьтӧ сералӧ да радуйтчӧ, что сы йылісь эз вунӧтӧ. Оз киссьы, оз жугав, а служитӧ хозяйкаыслӧ, кыдз шуӧны, вераӧн да правдаӧн. Вӧлі кад, кӧр сы йылісь вунӧтчылісӧ ни, но вит год ни кыдз бӧра пондіс «уджавны» отирлӧ. Дзир сэк Деминаын предприниматель Валентина Зубова осьтӧма половиккез кыйсян производство. Татьяна Трушникова тожӧ кутчисьӧма эта ремесло бердӧ. Инькаэз кыйӧмась, а «хозяйкаыс» реализуйтлӧма половиккесӧ, кытчӧ вермывлӧма. Уна вузасьліс Валентина Зубова фестиваллез вылын, сетавлӧма и магазиннэзӧ. Товарыс босьтана, реализация бура мунӧ.


Кынымкӧ год бӧрті Татьяна Трушникова петӧма ӧтласа производствоись да ачыс пондӧма кыйны-вузасьны. Кыйӧ не тюккезӧн ни, а дженытик, метр да джын кузя ковриккез. Вузалӧ нійӧ тӧдсаэзлӧ, нельки Перемын сылісь рӧма, быдкодь сера джодждӧрасӧ кыкнан киӧн босьтӧны. Ас кыйӧмыс сё ни буржык. Да и кӧркӧся станоккез вылын половикыс унаись крепытжык, кок увтын не оз чукрась. Кытчӧдз кыйӧм половиккез эз на вузассьӧ, Татьяна Андреевна пукалӧ станок сайын да кыйӧ «заготовкаэз» коми-пермяцкӧй паськӧм понда. Нійӧ закажитӧма Кудымкарись национальнӧй паськӧм вурсись Вера Мехоношина. И вот кись увтісь петӧны лен вылын гӧрд рӧма орнаменттэз: катшакок, радз, кӧрсюр. Кытчӧдз нія йитӧмӧсь ӧтамӧд бердӧ, но мастер, кӧда вурӧ паськӧмсӧ, нійӧ чожа вундалас ленточкаэз вылӧ да вурас соспоннэзӧ, йӧрнӧс голяӧ, юбка дорӧ. И орнаментыс мӧдмоза пондас «орсны». Сідзжӧ Татьяна Андреевна станок вылын «серӧтӧ» салфеткаэз. Видзӧтан ны вылӧ, и сьӧлӧм радуйтчӧ, басӧкӧсь, рӧмаӧсь, коми-пермяцкӧй серӧн серӧтӧмӧсь. Пызанок или тубочка вылӧ позьӧ ольсалыштны либо видзны кухняын сэтшӧм жӧ басӧк доз увтын.

Тамара Симанова кузь луннэзӧн гӧрдззисьӧ да серӧтчӧ.
Тамара Симанова кузь луннэзӧн гӧрдззисьӧ да серӧтчӧ.
Нина Симановалісь чышкӧттэсӧ босьтӧны свадьбаэз вылӧ.
Нина Симановалісь чышкӧттэсӧ босьтӧны свадьбаэз вылӧ.

Пырам мӧд керкуӧ, кытӧн олӧны мама-ныла Тамара Васильевна да Нина Симановаэз. И эстӧн быдса производство уджалӧ! Нина Леонидовнаыс половиккез пондӧма кыйны тожӧ Валентина Зубова кипод увтын, а ӧні пондӧтӧма ассис предпринимательскӧй удж. Дорйӧма бизнес-проект, сетӧмась сылӧ сё тысяча руб. Ны вылӧ небӧма важ станок, суниссэз да пондӧтӧма кыйсян удж. Станок вылын швачкӧ-кыйӧ половик, закажитӧма, пӧ ӧтік баб. Ачыс, шуӧ, оз вермы кыйны, да и дышмӧма ни ӧння отирыс. Но Нина Леонидовналӧ эта уджыс сьӧлӧмви. Кӧть и образованнёыс педагогическӧй, киӧн кужӧ керны быдторсӧ. Луннас вермӧ кыйны кык метра кузя половиксӧ, кыйыштас, шоччисяс, да бӧра. А эд карта вылын эшӧ пода видзчисьӧ: мӧс, кроликкез, курӧггез, порсь, дзодзоггез. Мамыс, Тамара Васильевнаыс, только ӧдззӧтӧ нывсӧ, ачыс ӧтік минута весь оз пукав: то гӧрдззисьӧ, то серӧтчӧ.
– Носкисӧ гӧрдзза, тапочкисӧ гӧрдзза, кӧдӧ челядьӧлӧ, кӧдӧ вузала, – баитӧ Тамара Симанова. – Одзза годас тапочкасӧ 50 гоз гӧгӧр гӧрдззылі, дак чисто вузалі.
– Ӧні вурунсис носкисӧ новйӧны жӧ эшӧ? – юася инькаэзлісь.
– Новйӧны, – бӧра баснисӧ нуӧтӧ одзлань Тамара Васильевна. – Зоннэзӧ новйӧны, менам Перемас роч ичмонька эм, дак сія тӧв и гожум новйӧ.
– Ме ярмаркаэз вылас 50 да 100 рублейӧн вузала, гиль-голь токо мунас, – паныт шыасьӧ нылыс, Нинаыс.
Тамара Васильевна ассис куимнан нывсӧ велӧтӧма гӧрдззисян дорас, нучаткаэслӧ ни ремеслосӧ бы сетӧ. Асьсӧ тожӧ кӧркӧ бабыс пуксьӧтӧма печакан да станок саяс.
– Ме учӧтсянь кыйны велалі, – баитӧ Тамара Васильевна, – унажыксӧ бабӧкӧт. Тшӧктывлісӧ печкисьны, кыйим половик, чочком дӧра, престӧддез, сэсся сэтісь и запоннэсӧ вурисӧ, и юбкаэсӧ, и мешӧккесӧ, кӧичкаэз. Кӧр татчӧ локті, понді чышкӧттэз кыйны, первосянь полоскаэзӧн кыйи, а эстӧн ӧліс Мария Михайловна, сія меным мыччаліс, кыдз колӧ кыйны – ӧктыны. Шуис, этӧ кӧ кыян, то пондан кужны керны быдкодь серсӧ. Менам мыйкӧ сообразительностьӧ ыджыт вӧлі, чожа велалі, сэсся ачым понді лӧсьӧтлыны серресӧ.
Мама-ныла паськӧтісӧ диван вылӧ ас кыйӧм чышкӧттэсӧ – чочком дӧра вылын пежьялӧны быдкодь рӧма узӧррез. Чышкӧтыс кыйӧм босьтӧм леновӧй сунисісь, а серыс – ирисісь. Ленсӧ ӧні озӧ ни вӧдитӧ, но Нина Симанова сёжӧ горт деревнясис адззӧма важ ленісь сунис да небӧма кык мешӧк.
– Ме тшӧкта панны невночка престӧдь вылӧ, кык ректан гӧгӧр, – ӧмалӧ нывсӧ Тамара Васильевна. – Лёныс эта колхознӧй вӧлі, сэкся, кӧр эшӧ вӧдитлісӧ сійӧ татӧн совхозас. Печкывлісӧ мешӧккез да мый да кыйны, а Катяыс, кӧдалісь босьтім, уджаліс складовщикӧн, вот сія и сохранитӧма.
Лёныс и былись стариннӧй, нельки краситӧм петшӧрӧн, а не краскаӧн.
– Одзжык краситлісӧ зеленӧйсӧ петшӧрӧн да бадь качӧн, а чочкомтлісӧ пӧимӧн, – касьтылӧ инька да бӧра кутчисьӧ удж бердӧ.
Вот сідз, баитӧмӧн да касьтылӧмӧн Тамара Васильевна киын нельки быдса тапочки гӧрдззиссис. А Нина нылыслӧн сы коста половикас содіс куим сер.

Ирина Дульцева

Добавить комментарий

Ваш e-mail не будет опубликован. Обязательные поля помечены *